ကွင်းလယ်ဒိုင်ကို ဝေဖန်လိုက်တဲ့ အန်ဆယ်လော့တီ၊ ခြေစွမ်းပြနိုင်ခဲ့လို့ ချီးကျူးခံနေရတဲ့ ဗင်နီးစီးယက်စ် (လာလီဂါ နောက်ဆုံးရ သတင်းများ)

ကွင်းလယ်ဒိုင်ကို ဝေဖန်လိုက်တဲ့ အန်ဆယ်လော့တီ၊ ခြေစွမ်းပြနိုင်ခဲ့လို့ ချီးကျူးခံနေရတဲ့ ဗင်နီးစီးယက်စ် အစရှိတဲ့ သတင်းတွေ အပါအဝင် မေလ ၁၀ ရက်နေ့ရဲ့ လာလီဂါ သတင်း တချို့ကို ဖော်ပြပေးသွားမှာ ဖြစ်ပါတယ်။

ကွင်းလယ်ဒိုင်ကို ဝေဖန်လိုက်တဲ့ အန်ဆယ်လော့တီ

လာလီဂါ ကလပ် ရီးရဲလ်မက်ဒရစ် နည်းပြကြီး ကာလို အန်ဆယ်လော့တီ ကတော့ ညက ကစားခဲ့တဲ့ မန်ချက်စတာစီးတီးနဲ့ ပွဲမှာ သူတို့ ပေးလိုက်ရတဲ့ ချေပဂိုး အတွက် တော်တော်လေး ခံပြင်းနေခဲ့ပါတယ်။ တစ်ဖက် တစ်ဂိုးစီနဲ့ သရေကျခဲ့တဲ့ ပွဲမှာ ရီးရဲလ်တို့ ဦးဆောင်ဂိုး ရထားပြီး ကီဗင် ဒီဘရိုင်းနားရဲ့ ချေပဂိုးကို ခွင့်ပြုခဲ့ရတာ ဖြစ်ပါတယ်။

ဒါပေမယ့် ဒီဂိုး အတွက် မန်စီးတီးတို့ ကစားကွက် ပြန်လည် စတင်ချိန်မှာ ဘာနာဒိုဆေးလ်ဗားက ဘေးစည်း ကျော်သွားတဲ့ ဘောလုံးကို ဆွဲယူသွားခဲ့တာ ဖြစ်ပါတယ်။ အဲဒီက တဆင့် ချေပဂိုးရသွားခဲ့တာ ဖြစ်ပြီး အန်ဆယ်လော့တီနဲ့ သူ့ရဲ့ ကစားသမားတွေက စောဒက တက်ခဲ့ပေမယ့် ဒိုင်ကတော့ ဂိုးပေးခဲ့ပါတယ်။

“ ဘာနာဒို ဆေးလ်ဗား ဘောလုံးယူချိန်မှာ ဘေးစည်းကို ကျော်သွားတာ ကျနော် တွေ့လိုက်တယ်၊ ဒါပေမယ့် ကွင်းလယ်ဒိုင်က ဘာလို့များ VAR ကို မကြည့်ခဲ့လဲ ကျနော် နားမလည်နိုင်ပါဘူး” လို့ အန်ဆယ်လော့တီက ပြောဆိုသွားခဲ့ပါတယ်။

ဂိုးပေးလိုက်ရချိန်မှာ သူ စောဒကတက်ခဲ့ပေမယ့် အဝါကတ်တောင် အပြခံလိုက်ရပါတယ်။ ရီးရဲလ် အတွက်တော့ ဒါက နစ်နာမှု တစ်ခုပါပဲ။ ၁-၀ နဲ့ ပွဲပြီးခဲ့မယ် ဆိုရင် ဒုတိယအကျော့ အတွက် သူတို့တွေ အခွင့်အရေး အများကြီး ရှိသွားမှာပါ။ အခုတော့ ဆတူ အခွင့်အရေးနဲ့ပဲ အီတီဟတ်ကို သွားရပါတော့မယ်။

ခြေစွမ်းပြနိုင်ခဲ့လို့ ချီးကျူးခံနေရတဲ့ ဗီနီစီးယက်စ်

ရီးရဲလ်မက်ဒရစ် တောင်ပံကစားသမား ဗင်နီးစီးယက်စ် ဂျူနီယာ ကတော့ မန်ချက်စတာစီးတီးနဲ့ ပွဲမှာလည်း ခြေစွမ်းပြ ကစားသွားခဲ့ပါတယ်။ အသင်း အတွက် အရေးပါတဲ့ ဦးဆောင်ဂိုးကို သွင်းယူပေးခဲ့သလို တပွဲလုံး မှာလည်း မန်စီးတီး ခံစစ်ခြမ်းကို ကောင်းကောင်း အခက်တွေ့အောင် ဖိအားပေးခဲ့ပြီး တောင်ပံကစားသမား တစ်ဦး ဆိုတာ ဘယ်လိုလဲ ဆိုတာကို ပြသခဲ့ပါတယ်။

ဗင်နီးစီးယက်စ်ဟာ မန်စီးတီး ကစားသမားတွေကို မကြာခဏ ဆိုသလို ကျော်ဖြတ်ပြနေခဲ့ပြီး သူ့ကို ကိုင်လ် ဝေါလ်ကာတို့ မနည်းထိန်းခဲ့ရပါတယ်။ အတိုးအလှုပ်တွေ၊ အလိမ်အခေါက်တွေနဲ့ ပရိယာယ် အပြည့်ပါတဲ့ ကစားဟန်မှာ မန်စီးတီးတို့ အာရုံ တစ်ချက်လေးတောင်မှ အလွတ်မခံနိုင်ခဲ့ဘဲ သူ့ကို ထိန်းချုပ်နေခဲ့ရတာပါ။
ညက ပွဲအပြီး မှာတော့ ဗင်နီးစီးယက်စ်က ကမ္ဘာ့အကောင်းဆုံး တောင်ပံကစားသမားလို့ ပရိသတ်တွေက ချီးကျူးခဲ့ကြပါတယ်။ ဘရာဇီးလ်သားဟာ စပိန် လာလီဂါ မှာလည်း အကောင်းဆုံး တောင်ပံကစားသမားလို့ သတ်မှတ်ခံထားရပြီး ချန်ပီယံလိဂ် မှာပါ သူ့ရဲ့ ပုံစံကောင်းကို ပြသနိုင်ခဲ့တာ ဖြစ်ပါတယ်။

ဟာလန်းကို အိတ်ကပ်ထဲ ကောက်ထည့်ထားခဲ့တဲ့ ရူဒီဂါ

ရီးရဲလ်မက်ဒရစ် နောက်ခံလူ အန်တိုနီယို ရူဒီဂါ ကတော့ မနေ့ညက ပွဲမှာ မန်စီးတီး တိုက်စစ်မှူး အာလင်း ဟာလန်းကို တော်တော်လေးကို အခက်တွေ့အောင် ကစားပြသွားခဲ့ပါတယ်။ ဟာလန်းဟာ တစ်ပွဲလုံးမှာ ဘောလုံးထိချက် ၂၁ ကြိမ်သာ ရှိခဲ့ပြီး ခြေစွမ်း မပြနိုင်ခဲ့ဘဲ ရှိနေခဲ့ကာ သူ့ကို ရူဒီဂါက အိတ်ကပ်ထဲ ကောက်ထည့်သွားခဲ့ပါတယ်။

ဟာလန်းရဲ့ ဘောလုံး ထိချက် အရေအတွက်ဟာ အသင်းဖော် ဂိုးသမား အီဒါဆန် ထက်တောင်မှ နည်းပါးနေခဲ့တာလည်း ဖြစ်ပါတယ်။ စပိန် သတင်းစာ Marca ကတော့ ဒီပွဲက ဟာလန်းရဲ့ စွမ်းဆောင်ရည်ကို 3/10 သာ Rating သတ်မှတ်ပေးခဲ့ပြီး နော်ဝေသား တစ်ယောက် တော်တော်လေး အခြေအနေဆိုးခဲ့တယ် လို့ပဲ ပြောရပါလိမ့်မယ်။

ဒီရာသီမှာ ပြိုင်ပွဲစုံ သွင်းဂိုး ၅၁ ဂိုး အထိ ရရှိထားတဲ့ ဟာလန်းဟာ ရီးရဲလ်နဲ့ အတွေ့မှာတော့ ခြေထောက်ကြိုးနဲ့ တုပ်ပြီး ကစားခဲ့ရသလိုပါပဲ။ ရူဒီဂါရဲ့ Rating ကိုတော့ Marca က 10/10 အပြည့် ပေးခဲ့ကာ ပရီးမီးယားလိဂ်ရဲ့ ထိပ်တန်း ဂိုးသွင်းရှင် တစ်ဦးကို အိတ်ကပ်ထဲ ကောက်ထည့်ပြခဲ့မှုက တကယ်ကို အသိအမှတ်ပြုစရာပါပဲ။

 

●●●

နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS

အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်

ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , တွစ်တာ , အင်စတာဂရမ် and ယူကျု့ဘ်.